Rais Samia Suluhu Hassan, akiwa kwenye msiba wa aliyekuwa Katibu Mtendaji wa Tume ya Mipango, Lawrence Nyasebwa Mafuru, alielezea jinsi alivyolazimika kujivua urais kwa muda.

Katika hotuba yake ya kihisia iliyojawa na kumbukumbu za mchango wa Mafuru kwa Taifa, Rais Samia alisimulia tukio maalum ambapo alijivua urais kwa muda na kumkabidhi Mafuru majukumu hayo ili kuona jinsi ambavyo angeweza kutatua changamoto iliyokuwa ikiwakabili.

Akieleza tukio hilo, Novemba 14, 2024, Rais Samia alisema kuwa changamoto kubwa kwenye miradi ya ujenzi iliwakutanisha viongozi serikalini katika kikao kilichofanyika Zanzibar.

Wakati majadiliano yalipofika kwenye kiwango kigumu, alitoa changamoto kwa kusema kuwa kwa hali hiyo, kama mmoja wao angekuwa Rais, angefanya nini.

Hapo ndipo alipomwambia Mafuru kusimama na kujiona kama Rais kwa muda huo na kutoa maamuzi.

Kwa unyenyekevu, Mafuru alijibu kuwa hakuwa Rais na kwamba nafasi hiyo ilikuwa mbali naye, lakini alitoa mchango ambao, kwa mujibu wa Rais Samia, uliwawezesha viongozi hao kusonga mbele.

Rais aligusia jinsi wasaidizi wake waliohudhuria kikao hicho walivyokumbuka mchango wa Mafuru, wakifuta machozi kwa huzuni.

“Mchango wake ulikuwa mkubwa, Taifa limepoteza kiongozi mwenye hekima na busara nyingi,” alisema Rais Samia wakati wa mazishi ya Mafuru, akimpongeza kwa unyenyekevu na uwezo wake wa kuongoza.